ਜਨਮ ਦਿਨ-ਕੇਵਲ ਸਿੰਘ ਨਿਰਦੋਸ਼ ਦੁਸਾਂਝ ਕੈਮਲੂਪਸ

ਜਨਮ ਦਿਨ

ਜਿਸ ਘਾਟੇ ਦਾ ਆਏ ਸਾਲ ਹੀ ,

ਜਸ਼ਨ ਮਨਾਉਂਦੇ ਰਹਿੰਦੇ ।

ਉਸ ਨੂੰ ਕੱਟ ਕੇ ਕੇਕ ਅਸੀਂ ਹਾਂ ,

ਜਨਮ ਮੁਬਾਰਕ ਕਹਿੰਦੇ ।

ਜਿਉਂ ਜਿਉਂ ਬੱਚਾ ਵੱਧਦਾ ਉਸਦੀ ,

ਅਉਧ ਹੈ ਘਟਦੀ ਜਾਂਦੀ ।

ਮਾਂ ਪੁੱਤਰ ਨੂੰ ਵੇਖ ਵੇਖ ਕੇ ,

ਫੁੱਲੀ ਨਹੀਂ ਸਮਾਂਦੀ ।

ਵਾਹ ਵਾਹ ਜਗਤ ਰਚੈਤਾ ਤੂੰ ਇਹ ,

ਕੈਸਾ ਖੇਲ੍ਹ ਰਚਾਇਆ ।

ਤੇਰਾ ਏਹੇ ਭੇਤ ਅਗੰਮੀ ,

ਸਮਝ ਜ਼ਰਾ ਨਾ ਆਇਆ ।

ਉਮਰ ਤਿਜੌਰੀ ਵਿੱਚੋਂ ਮਨਫ਼ੀ ,

ਸਾਹ ਨਿੱਤ ਹੁੰਦੇ ਜਾਵਣ ।

ਇਸ ਘਾਟੇ ਨੂੰ ਖਾਂਦੇ ਲੋਕੀਂ ,

ਖੁਸ਼ੀਆਂ ਪਏ ਮਨਾਵਣ ।

ਜਿਉਂ ਪੱਤਣਾਂ ਤੋਂ ਲੰਘੇ ਪਾਣੀ ,

ਕਦੇ ਨਾ ਆਉਂਦੇ ਮੁੜਕੇ ।

ਬੇੜੀ ਪੂਰ ਤ੍ਰਿੰਜਣੀ ਕੁੜੀਆਂ ,

ਮਿਲਣ ਸਬੱਬੀਂ ਜੁੜਕੇ ।

ਬੈਠ ਕਿਸੇ ਨਹੀਂ ਰਹਿਣਾ ਇਹ ਹੈ ,

ਜਗਤ ਮੁਸਾਫ਼ਿਰ ਖਾਨਾ ।

ਆ ਗਏ ਸੱਦੜੇ ਜਾਣਾ ਪੈਣਾ ,

ਚਲਣਾ ਨਹੀਂ ਬਹਾਨਾ ।

ਕਰ ਨਿਰਦੋਸ਼ ਸਮੇ ਨੂੰ ਸਫ਼ਲਾ ,

ਕੰਮ ਨੇਕੀ ਦੇ ਕਰਕੇ ।

ਅਮਰ ਰਹੇਂਗਾ ਵਿੱਚ ਦਿਲਾਂ ਦੇ ,

ਨਹੀਂ ਮਰੇਂਗਾ ਮਰਕੇ ।

ਕੇਵਲ ਸਿੰਘ ਨਿਰਦੋਸ਼ ਦੁਸਾਂਝ ਕੈਮਲੂਪਸ